Әйгілі Fiverr сайтында қалай тіркелуге және ақша табуға болады. Фрилансерлердің нақты тәжірибесі.
Темірлан Баянов, 24 жаста, Алматы қаласы, 3D Artist, Motion Designer, @tim.bayanov
Өзім туралы
Мен 3D суретшімін. Маркетингте, ойын индустриясында және азық-түлік компанияларында жарнамалық анимациялар жасаймын. 2020 жылы жарнама агенттігінде тәжірибе жинағаннан кейін фрилансингке келдім.
3D моушн-дизайн, VFX роликтер, азық-түлік 3D роликтер, кейде 2D анимациялар секілді қызметтерді ұсынамын.
Fiverr-мен жұмыс туралы
Фриланс-платформаны іздеу кезінде әртүрлі нұсқаларды қарастырдым. Көбінесе Fiverr және Upwork табылды. Екеуін де сынап көрдім.
Upwork-те тапсырыстарды өз бетінше іздеп, мониторинг жүргізу және өз қызметтеріңді ұсыну қажет. Мұнда нақты уақытта кім тапсырыс беретінін көруге болады. Кейде бағалар демпингке ұшырайды. Ал бұрын тіркелген адамдар жобаларға жиі ие болады.
Fiverr жүйесінде жүйе басқаша жұмыс істейді. Сіз клиентті іздемейсіз, тапсырыс берушілер сізді өздері табады. Егер портфолио мен баға сәйкес келсе, онда сіз бірінші тапсырысты ала аласыз. Жұмысты неғұрлым жиі алсаңыз, соғұрлым көп клиенттер пікір қалдырады — осылайша сіз орындаушылардың иерархиясында көтеріле аласыз.
Қалай тіркелу керек
Сіз пошта арқылы тіркеле аласыз. Әрі қарай, сіз өзіңіз туралы деректерді толтырып, Gigs жиынтығын жасауыңыз керек — бұл қызметтер пакеті бар портфолио. Бұл жерде сіз жұмыс істейтін бағдарламалар, қандай да бір тапсырма қанша уақыт алады туралы жазасыз. Пакеттің үш түрі бар: Basic, Standard, Premium. Әрқайсысының бағасын өз бетіңізше қоясыз.
Тапсырысты алу үшін тек күту керек. Егер сіздің Gigs басқаларына қарағанда жақсы көрінсе, клиент сізді табады. Маған бірінші тапсырыс беру үшін төрт-бес ай қажет болды. Мен пакетті толтыруға бірнеше күн жұмсадым. Қосымша жұмыс қажет емес.
Тапсырыстар мен төлемді қалай алуға болады
Алдымен ақша Fiverr шотына түседі. Сома 21 күнге сақталады. Бұл уақыт тапсырыс беруші қызмет орындалмады немесе дұрыс жасалмады деп шешкен жағдайда беріледі. Үш аптадан кейін Payoneer шотынан ақша ала аласыз. Олар бір күн ішінде келеді. Әрі қарай, қаражатты кез-келген ыңғайлы тәсілмен Visa немесе Mastercard-қа жібересіз.
Менің сегментімде бағалар аймақтан және жұмыстың күрделілігіне қарай өзгеріп тұрады. Күрделі Gigs үшін мен 1000-1500 доллар алып, 30 күн жұмсай аламын. Қарапайым тапсырмалар үшін мен бірнеше күн жұмсаймын және 200 доллар табамын. Жақсы нәтиже үшін әртүрлі дағдылары бар бірнеше Gigs құруды ұсынамын.
Fiverr артықшылықтары мен кемшіліктері
Сайттың артықшылықтары:
— клиенттер сізді өздері табады
— чектер Upwork-қа қарағанда жоғары, ал бәсекелестер сіздің бағаңызды көтермейді
— рейтинг тапсырыстар санына әсер етеді
— клиентпен қарым-қатынас кезінде оның ТТ, референс және басқа да мәліметтеріне байланысты бағаны өзгертуге болады
Сайттың кемшіліктері:
— сайттың комиссиясы тапсырыстың 15-20% құрайды. 500 доллар тапсаңыз, 400-425 аласыз.
— егер сіздің Gigs қарапайым болса, бірінші тапсырысты алу қиын.
Жаңадан бастаушыларға арналған кеңестер
Бір-екі күн өткізіп, барлық ақпаратты егжей-тегжейлі толтырыңыз. Жалқауланбаңыз, өйткені бұл жақсы ақша табуға көмектеседі.
Бір платформамен шектелмеңіз. Өз салаңызда белсенді болыңыз. Нетворк құрыңыз және табыс табудың әр түрлі жолын іздеңіз.
Аслан Балтабаев, 23 жаста, Алматы қаласы, фрилансер, @bamblasl
Өзім туралы
Мен фриланста моушн-дизайнмен айналысамын. Fiverr және Upwork интернет-платформаларында жұмыс істеймін. Әдетте мұнда қарапайым анимацияларға, логотиптерге, палкаттарға, титрлерге және тағы да басқаға тапсырыс беріледі.
Fiverr-мен жұмыс туралы
Мен Fiverr-ді онда жұмыс істеу ең ыңғайлы болғаны үшін таңдадым. Upwork, Freelancer, Freelance hunt сияқты басқа да сайттарда клиенттердің өтінімдерін үнемі бақылап, оларға жауап беріп, түпнұсқа мәтінді ойлап табу қажет. Әрбір өтінімге 30-50 фрилансер болуы мүмкін, бұл тапсырысты алу мүмкіндігін азайтады.
Fiverr-да фрилансер өз қызметін ұсынады, мысалы: «Логотиптің әдемі анимациясын жасаймын». Қосымша, шарттар мен бағаларын көрсетеді. Барлығы үш пакет бар: негізгі, орташа және ең қымбат. Клиент өзіне ыңғайлысын таңдайды. Сондай-ақ, тапсырыс беруші сізбен бірге жеке пакетті құрастырып, кеңесе алады.
Қалай тіркелу керек
Жұмысты бастау үшін сіз ұсынғыңыз келетін қызметті таңдау қажет. «Мен анимация жасаймын» немесе «Мен моушн-дизайн жасаймын» сияқты ортақ сөз тіркестерін жазбау маңызды. Себебі клиент іздеуге не қажет екенін енгізеді. «Моушн-дизайн» сөзін енгізе отырып, ол 20 000-нан астам фрилансерді көреді. Белгілі бір тақырыптарға арналған қызметтерді жасаңыз. Мысалы, «Күміс сақтағыштың анимациясын жасай аламын».
Одан кейін профильді толтыру керек. Сипаттама тым қысқа және ұзақ болмауы керек. Жұмыс тәжірибеңіз, қандай компаниялармен жұмыс істегеніңіз және қандай бағдарламаларды меңгергеніңіз туралы айтып беріңіз. Фотосурет кәсіби болуы тиіс: түрлі-түсті фондағы портреттік сурет. Сіздің профиліңіз — клиенттерге арналған визит карточкасы.
Қызметті тіркеу үшін алдын ала әдемі және түсінікті бейнежазба мен фотосурет қажет болады. Осы қызметпен байланысты өз жұмыстарыңызды көрсету керек. Мәтіндік сипаттама да маңызды.
Тапсырыстар мен төлемдерді қалай алуға болады
Қазақстанда ақы төлеуге шектеу жоқ. Тапсырыс жабылған сәттен бастап ақша сіздің шотыңызға екі аптадан кейін келеді. Одан кейін Payoneer онлайн-шотын ашып, алдымен сол жерге, содан кейін қазақстандық картаға аудару керек. Fiverr комиссия алады — тапсырыс сомасының 30%. Payoneer-де 2-3% комиссия бар.
Менің сегментімде ең жоғары орташа чек бар. Тапсырыстардың әртүрлі шағын санаттары бар:
1. Тайтл анимациясы немесе интро сияқты шағын жобалар. Орташа чек — 80 доллар. Аптасына төрт-бес тапсырыс келуі мүмкін.
2. Үлкен тапсырыстар. Бұған екі минутқа арналған жарнамалық роликтер, инфографика және тағы дабасқалары жатады. Үлкен жұмыс үшін төлем жоғары. Бір минуттық роликтің құны 500 доллар және одан жоғары болады.
3. 3D-анимацияға тапсырыстар. Бағалар 700 доллардан басталады
Fiverr-де жаңадан жұмыс істей бастаған адам миллиондаған ақша таба алмайды. Ол үшін клиенттерден тәжірибе мен пікірлер жинау қажет. Мен бастапқыда өз қызметтеріме 5-10 доллар баға қойдым және беделімді ала отырып, біртіндеп көтердім.
Fiverr артықшылықтары мен кемшіліктері
Сайттың артықшылықтары:
— 2000 доллар және одан жоғары табыс табуға болады
— жұмыс орны мен кестеге байланысы жоқ, тіпті Мальдив немесе Балиден де жұмыс істеуге болады
— клиенттермен қарым-қатынас жасай отырып, ағылшын тілінің деңгейін арттыру мүмкіндігі. Бірінші тапсырыс кезінде мен клиенттен бірнеше рет бірдей нәрселерді сұрадым. Ол frustrating деп жазып, тапсырыстан бас тартты. Сөйтіп мен «раздражающий» деген сөзді үйрендім.
Сайттың кемшіліктері:
— мыңдаған түзетулер енгізетін, жұмысқа кірісіп, төлем жасамайтын немесе қорлауды бастайтын клиенттар бар. Бірақ ондайлар аз, оннан бірі ғана сондай
— жаңадан келгендер кері байланыс үшін аз ақшаға жұмыс істеуге тура келеді
— тапсырыссыз тұрып қалатын күндер болады.
Жаңадан бастаушыларға кеңестер
Клиент баяу жауап берсе де, жылдам жауап беріңіз. Қосымшаны телефонға орнатып, хабарландыруларды қосыңыз: осылайша хабарларды жіберіп алмайсыз.
Егер қызметті шеше алмасаңыз, платформадағы басқа аккаунттарды қараңыз. Басқа фрилансерлердің өз сипаттамаларында қандай жобалар ең танымал екенін бақылаңыз.
