Орталық Азияның робототехниканы оқып жүрген жастарымен кездесіп, сұхбаттастық. Олар неліктен осы хоббиді таңдағандарын және оның өмірде қандай артықшылықтар беретінін айтып берді.
Жәңгірхан Шалабаев, 15 жаста, қаласы — Алматы
Өзі туралы
Мен Алматыдағы химия-биология бағытындағы НЗМ тоғызыншы сыныбын бітірдім. Бос уақытымда робототехникамен айналысамын немесе достарыммен сөйлесемін. Мен Eco Grow System жобасын — өсімдіктерді үй жағдайында өсіруге арналған автоматтандырылған жүйе әзірлеп жатырмын.
Робототехникаға қызығушылығы туралы
11 жасымда робототехникаға қызығушылық танытып, құрылғыларды жасау және автоматтандырудың жаңа хоббиім екенін түсіндім. Маған жаңа жобалар ойлап тауып, сосын идеяларды шындыққа айналдырған ұнайды.
Робототехника менің логикалық ойлауымды жақсартты. Роботтарды бағдарламалау кезінде стратегия мен командалардың реттілігін ойластыру қажет. Мен қателіктерге бола көңіл күйімді түсірмеуді үйрендім, өйткені жарыстарда жиі бір нәрсе бұзылып, жұмыс істемей қалуы мүмкін, ал қайта бағдарламалау кезінде жаңа қателер пайда болуы ықтимал.
Бірінші байқауда датчигім жұмыс істемей қалды, мен қобалжып, әрі қарай қалай қатысатынымды білмедім. Бірақ проблеманың неде екенін түсіндім де, оны тез шештім.
Қызығушылықтары ұқсас адамдар туралы
Бүгінгі таңда балаларда негіздерден бастап тереңдетілген ғылыми жобаларға дейінгі курстардың үлкен таңдауы бар. Робототехника бірнеше себептерге байланысты өте танымал.
Біріншіден, робототехника шығармашылық пен техникалық дағдыларды біріктіреді. Екіншіден, заманауи әлемде роботтар мен автоматтандырудың маңыздылығы артып келеді. Үшіншіден, робототехника командалық жұмыс пен коммуникацияны дамытуға ықпал етеді.
Менің қаламда робототехниканы ұнататын адамдар қауымдастығы бар, біз әртүрлі іс-шаралар мен жарыстарға бірге қатысамыз.
Әрі компаниялардың негізін салушылар, олардың өмірлік оқиғалары шабыттандырады. Бірақ әркім өз жолымен жүріп, мансабын өзі құруы керек деп ойлаймын.
Әлібер Әбдікерімов, 14 жаста, қаласы — Тоқмақ, @plantinor
Өзі туралы
Мен Жүсіп Баласағұн атындағы Тоқмақ лицейінде оқимын. Бос уақытымды ноутбукте немесе смартфонда өткіземін. Жиі сурет саламын, кейде кітап оқимын, музыка тыңдаймын немесе YouTube-тен видео көремін.
Робототехникаға қызығушылығы туралы
Бала кезімде сынған электронды ойыншықтарды бөлшектеуді ұнататынмын. Маған моторларын шығарып, батареялармен жұмыс істеу қызықтыратын. Сондықтан төртінші сыныпта ата-анам мені робототехникаға апарды.
Робототехникаға деген құштарлығым маған көп нәрсе берді. Мен командада жақсы жұмыс істеуді үйрендім және қызықты нәрселер құрастырдық. Ең бастысы, бағдарламалауды үйрендім.
Қызығушылықтары ұқсас адамдар туралы
Бүгінгі таңда робототехника ғана емес, сонымен қатар бағдарламалау да танымал. Мен басқа курстарда EV3 және Wedo 2.0-мен жұмыс істейтін адамдарды көрдім.
Бұл маған болашақта көмектесетінін, мұнымен жақсы ақша табуға болатынын білемін. Мен YouTube-тегі роликтерден шабыт аламын. Әртүрлі авторлардың бағдарламалау бойынша көптеген видео курстарын көремін және сондай биіктерге, тіпті одан да жоғары шыңдарға жетуге тырысамын.
Сабрина Рохаткулова, 18 жаста, қаласы — Душанбе, @sabrinarokhat
Өзі туралы
Мен физика және математика бағытындағы «Хотам және П.В.» тәжік-орыс лицей-интернатын бітірдім. 11 сыныпты бітіргеннен кейін Future Leaders Exchange Program: FLEX бағдарламасының финалисі атандым және Айова штатында халықаралық алмасу студенті болдым.
Қазір мен А.Н.Туполев атындағы Қазан ұлттық зерттеу техникалық университетінде «Бағдарламалық қамтамасыз ету инженериясы» бағыты бойынша оқып жатырмын.
Мен классикалық ағылшын және психологиялық әдебиеттерді оқуды ұнатамын. Бұрын өнер және музыка мектебіне барғанмын. Экологиялық белсенділік саласында волонтерлік қызметпен белсенді айналысамын. Математика мен бағдарламалауға деген құштарлық ерекше орын алады.
Робототехникаға қызығушылығы туралы
Алтыншы сыныпта мен алғаш рет Arduino IDE-де робототехника және бағдарламалаумен таныстым. Сондай-ақ робототехника бойынша қосымша үйірмелерге қатыстым, жыпылықтайтын шамдар, бағдаршамдар мен секундомерлердің алғашқы миниатюралық конструкцияларын бағдарламалауды және құрастыруды үйрендім.
Мектеп бағдарламалау мен математиканы оқуға деген ерекше сүйіспеншілігім пен қызығушылығымды оятты. Оныншы сыныпта бір сыныптасым LEGO бар робототехника курстары туралы айтып берді. 2019 жылдың қарашасында мен RobX-те оқуды бастадым, онда біз EV3-те LEGO роботтарын жасадық, халықаралық олимпиадаларға қатыстық және жеке жобалар жасадық.
Мен өз өмірімді IT саласымен байланыстыру туралы шешімімнің дұрыстығына көз жеткіздім, командада және жеке жұмыс жасау арқылы өз әлеуетімді аштым. Сыни ойлауды дамыттым, көшбасшылық қасиеттерімді жақсарттым, Telegram боттарын жасауды үйрендім, әртүрлі бағдарламалау тілдерін оқыдым.
Жұмыс істеп, хоббиіммен айналыса жүріп, мен болашағыма перспективалар жасай аламын. Робототехника мен жасанды интеллект саласының даму қарқынын ескере отырып, мықты мамандардың қашанда сұранысқа ие екенін айта аламын. Негізгі артықшылықтардың бірі — осы бағыттың кеңдігі, ол өзіңізді әртүрлі салада сынауға мүмкіндік береді. Менің дамудағы келесі қадамдарым IT компанияларында тағылымдамадан өту және жұмыс істеу болмақ, бұл маған әлемді аралап, осы салаға көзқарасты әртүрлі қырынан зерттеуге мүмкіндік береді.
Қызығушылықтары ұқсас адамдар туралы
Қазанға келген соң мен белсенді түрде жұмыс іздей бастадым. Сәтін салып, мен мектеп оқушыларына арналған робототехника фестивалінде ұйымдастырушы және волонтер болдым. Ол жерде Robodom-мен – робототехника және бағдарламалау мектебімен таныстым. Мені ол жаққа әкімші және мұғалім ретінде жұмысқа шақырды. Көп ұзамай мені Иннополисте өтетін республикалық радиотехникалық олимпиадаға төреші ретінде шақырды.
Мектеп оқушыларымен жұмыс істей жүріп, бұл саланың жаңа ұрпаққа тигізетін әсерін түсіндім. Робототехникамен айналысатын балалардың көбісі өз қиялдары мен дағдыларын пайдалана отырып, идеяларын шындыққа айналдыра алады. Ал олимпиадалар мен фестивальдерге қатысу көшбасшылық қасиеттер мен жауапкершілікті дамытуға көмектеседі.
Мен тоғызыншы сыныптан бері америкалық Boston Dynamics инженерлік компаниясының қызметін бақылап келемін. Олар робототехника мен жасанды интеллектті дамытуда керемет жетістіктерге қол жеткізді. Компанияның ең танымал роботтары — Spot, Atlas, BigDog. Олардың жұмысы мені шабыттандырады.
