Көптеген адамдар Еуропаға барып, ортағасырлық көне құрылыс үлгілері мен Қытайдағы тарихи ескерткіштерді көруді армандайды. Алайда, көрші елде де мұндай керемет жерлердің бар екенін көпшілік біле бермейді. Өзбекстанда туып өскен әріптесіміз Розиев Толибтің көмегімен Самарқандағы тамаша әсер қалдыратын бес орын жайлы айтамыз.
1. Регистан
XV—XVII ғасырларда үш алып ғимарат – Ұлықбек медресесі, Шер-Дор (Арыстан) және Тіллә-Қари (Алтынмен апталған) медреселері орналасқан қала орталығындағы алаң. Бұл медреселер ЮНЕСКО-ның Бүкіләлемдік мұра тізіміне енгізілген. Күн көзіне жылтырайтын өрнектерді, сәнді әшекейленіп, тамаша зерленген кереметті барып, өз көзіңмен көру керек.
2. Бибі-Ханым
Бибі-Ханым мешіті 1404 жылы Темірдің бұйрығымен салынған. Нақышталған мәрмәрмен және мешіттің өрнектерімен безендірілген қыш қабырғалар ұмытылмас әсер сыйлайды.
3. Ұлықбек обсерваториясы
Ұлықбек обсерваториясы – орта ғасырларда Самарқан анық көрінетін Кухак төбесінде салынған аса маңызды обсерватория. Құрылыстың жартысы жер астында орналасқан. Жер астына түсіп көрген адамдар ол жердің қорқынышты әрі қызықты екенін айтады. Бұл жер ғылым мен астрономияны сүйетіндерге ерекше ұнайды.
4. Гур-Эмир
Жаулаушы Ақсақ Темір мен оның отбасының кесенесі – бір күмбезді сағаналы ғимарат. Бұл кесене өрнектермен, мәрмәрмен безендіріліп, алтынмен және көк бояумен кескінделген. Жертөледе орналасқан сағананың төбесі жоғарғы қабатқа қарағанда аласа, ешқандай өрнек салынбаған. Мұнда Темір мен оның отбасы мүшелері жерленген.
5. «Худжум» жібек кілемдер фабрикасы
Қолмен жасалған бұйымдардың неліктен қымбат тұратынын білгіңіз келсе, «Худжум» жібек кілемдер фабрикасына келіңіз. Бұл жерде кілемдерді қолмен тігетін 400 әйел жұмыс істейді. Фабрикада өндіріс процесін бастан-аяқ тамашалап, тіпті дайын бұйымдарды сатып алуыңызға болады.