Төрт кемпір, бір шал — қазақтың біртуар ақыны, композитор Кенен Әзірбаевтың қызы, 5-сыныпқа келгенде атасы «Төрт кемпір, бір шалдың» «төртін», «Кененнің» «кенін» алып, Төрткен деп қысқартып қойыпты.
Ақпантоқпантұрарқожа — осыдан бірнеше жыл бұрын Оңтүстік Қазақстан облысының тұрғыны өзінің 20 әріптен тұратын ұзақ есімі арқылы ғаламтор жұлдызына айналған еді.
Ертуған — өмірге ер жүрек, батыр болып келген деген мағынаны білдіреді. Төлеген Тоқтаровпен бірге Мәскеуді қорғауға қатысқан қазақ, оған арналған жазушы Сәдібек Түгелдің «Ертуған» повесі де бар. Повесть авторының өзі де жиеніне дәл осы есімді берген, сондай-ақ дзюдодан үлкен жетістіктерге жетіп жүрген Ертуған Төреханов, боксшы Ертуған Зейнуллиновтың есімдері белгілі.
Айқаракөз — «Жігіттер» тобының әншісі Бағлан Әбдірайымов қызына өз тобының репертуарындағы дәл осы әннің атын берген екен.
Лашын — сұңқар тұқымдас жартқыш құс, қазақта қыран мен сұңқарды ер-азаматтарға теліп айтса, қыздарды лашынға теңейді. Ақиық ақын Мұқағалидің жарының аты Лашын екені баршаға мәлім.
Сауық — арабшадан аударғанда ойын-күлкі, сайран, даңқ деген мағынаны білдіреді. Қазақ радиосының сандуғашы атанған Сауық Жақанованың есімін күллі қазақ біледі.
Мейірлен — мейірімді дегенді білдіреді, «Орда» тобының әншісі Ерболат Беделхан қызының атын осылай қойған.
Ханбибі — ханның жары деген мағынаны білдіреді, мәртебелі есім. Әдетте, ақсүйек тұқымында дүниеге келген қыз балаға қойылады. Қазақ поэзиясында ерекше орны бар Ханбибі Есенқарақызын білмейтін қазақ жоқ шығар.
Эсманұр — араб тілінен аударғанда «биік сәуле» деген мағынаны білдіреді екен. Белгілі тележүргізуші Қазбек Қасым қызына дәл осындай есім берген.
Еліміздегі белгілі композитор, шәмшітанушы Қалдыбек Құрманәлі өз балаларының атын Шәмшіқалдаяқ, Бекзатсаттархан, Мұхтаршахан, Иманғалитасмағамбет қойған.
Сонымен қатар елімізде балаларына саяси немесе күнделікті жанұядағы оқиғалар мен спорттық сайыстарға байланысты есім берген қазақ отбасылары баршылық. Мысалы, Азиада атын қыз балаға да, ұлға да берген, ал ұлдарға Саммитхан, Саммитбек, Нұрсаммит, Дипломбек сияқты есімдер қойылған.
