Еліміздің агроөнеркәсіп саласында дәлме-дәл егін шаруашылығы мен «Smart-ферма» жүйесі енгізіледі. Бұл туралы бүгін үкіметте өткен баспасөз конференциясында жауапты ведомство өкілдері мәлімдеді. Ауыл шаруашылығы министрінің бірінші орынбасары Арман Евниев дәлме-дәл егін шаруашылығы өндіріс тиімділігін арттыратынын айтады. Себеб диқандар алқаптың электронды картасын қолданып, ғарыштық мониторинг жүргізуге және алдын ала ауа райы мәліметтеріне қол жеткізуге мүмкіндік алады. Сондай-ақ «SMART-ферма» жүйесі арқылы мал басына санақ жүргізіліп, жылыжайлар автономды түрде басқарылады. Тың бастамалар биыл пилоттық негізде Ақмола және Қарағанды облыстарында жүзеге асырылуы тиіс. Айта кетейік, фитосанитарлық қауіпсіздік саласында рұқсат құжаттарын беру үдерісі де автоматтандырылады. Мәселен, ветеринарлық сертификатты алу мерзімі 14 күннен 1 сағатқа дейін қысқармақ.
Дерек көзі: 24.kz