«Астана Операның» симфониялық оркестрі өнерсүйер қауымның назарына джаз және классикалық әуені үйлесімін тапқан ерекше тартымды бағдарламаны ұсынады. Қазақстанға еңбек сіңірген қайраткер Абзал Мұхитдинов жетекшілік ететін концерт 23 желтоқсанда театрдың үлкен залында өтеді.
Бұл туралы Астана әкімдігінің медиа орталығы хабарлайды.
Концертте XX ғасырдың көрнекті композиторларының әйгілі туындылары орындалатын болады. Елорда тұрғындары мен қонақтары Бродвей көрерменін таң қалдырған Леонардо Бернстайнның әлемге әйгілі «Вестсайд оқиғасы» мюзикліндегі симфониялық биін сүйсіне тамашалай алады. Кеш барысында сондай-ақ Бернстайнның тағы бір мюзиклі «Кандидтен» увертюрасы мен Кунигунданың ариясы шырқалмақ. Кунигунданың бейнесін «Астана Опера» театрының дарынды да жетекші әншісі, Башқұртстанның еңбек сіңірген әртісі Альфия Каримова сомдайтын болады.
Дерек көзі: 24.kz
